Prezident farmoni bilan 2026–2027 o‘quv yilidan Toshkent davlat yuridik universitetida bir qator yangi tashabbuslar joriy etiladi. Yangiliklar yuridik ta’limni modernizatsiya qilish va malakali kadrlar tayyorlashga qaratilgan.

Asosiy o‘zgarishlar:

• TDYuUda 3 yillik maxsus bakalavriat dasturi yo‘lga qo‘yiladi. Bu dasturga universitet huzuridagi akademik litsey, yuridik texnikum bitiruvchilari va oliy ma’lumotga ega shaxslar o‘z tanloviga ko‘ra qabul qilinadi.

• Qashqadaryo yuridik texnikumi negizida TDYuU huzuridagi akademik litsey tashkil etiladi.

2026–2027 o‘quv yilidan yana quyidagilar amalga oshiriladi:

• “Yurisprudensiya” yoki “Davlat va jamiyat boshqaruvi” bakalavriga ega shaxslar qayta tayyorlov talab etilmasdan umumiy o‘rta ta’lim maktablarida “Davlat va huquq asoslari” fanidan dars bera oladi.

• Huquq fanidan bilish darajasini baholash bo‘yicha test joriy qilinadi va natijalari asosida davlat namunasidagi sertifikat beriladi.

Bundan tashqari:

• 2026 yil 1 martdan TDYuUda “Yurisprudensiya”dan boshqa turdosh yo‘nalishlar bitiruvchilari uchun 2 yillik magistratura dasturi ochiladi.

Ushbu islohotlar yuridik ta’lim tizimini zamonaviy talablarga moslashtirish, huquqiy bilimga ega pedagoglar sonini oshirish va maktablarda huquqiy savodxonlik darajasini yuksaltirishga xizmat qiladi.